Clásicos Castellanos: Libro de Buen Amor

Por señas al rromano é qué le rrespondiera.
Diz': "Yo dixe qu' es un Dios; el rromano dixo qu'era "Uno en tres personas, é tal señal feziera.

[60] "Yo dixe que era todo á la su voluntad;

"Rrespondió qu'en su poder lo teni' e diz' verdad.
"Desque vi que entendíen é creyen la Trinidad,
"Entendí que meresçíen de leyes çertenidad."

[61] Preguntaron al vellaco quál fuera su antojo.

"Dixom' que con su dedo me quebraria el ojo:
"Desto ove grand pesar é tomé gran enojo.
"Rrespondile con saña, con yra é con cordojo

[62] "Que yo le quebraría, ante todas las gentes,

"Con dos dedos los ojos, con el pulgar los dientes.
"Díxome enpós esto que le parase mientes,
"Que m' daría grand palmada en los oydos rretenientes.

[63] "Yo le respondí que l' daría tal puñada,

"Que en tienpo de su vida nunca le viés' vengada.
"Desque vió la pelea tan mal aparejada,
"Dexó de amenazar do non le preçian nada."

[64] Por esto diz' la pastraña de la vieja fardida:

"Non há mala palabra, si non es á mal tenida";
Verás que bien es dicha, si bien fues' entendida:
Entiende bien mi libro: avrás dueña garrida.

[65] La bulrra que oyeres, non la tengas por vil;

La manera del libro entiéndela sotil: